Oordenking 22 Januarie 2012

Oordenking 22 Januarie 2012
Ons beleidsverklaring

“Ons verkondig die woord (van God) in opregtheid, in verbondenheid met Christus, in opdrag van God en in verantwoordelikheid aan God.” (2 Kor. 3:17b)

Die begin van ‘n nuwe jaar is ‘n goeie geleentheid om net weer seker te maak waarmee is ons besig en waarmee wil ons besig wees as gelowige kinders van die Here. Kom ons noem dit ons beleidsverklaring.

Paulus help ons baie hiermee in die betrokke Skrifgedeelte. Hy sê onder andere “die evangelie van Christus ... het die deure vir my wyd oopgemaak” (2 Kor. 3:12). Daar is steeds vandag onbeperkte geleenthede dat ons die goeie nuus oor die verlossing deur Christus alleen, kan versprei. Ja, sê Paulus, “deur ons versprei God die kennis van Christus oral soos ‘n aangename geur.” (2 Kor. 3:14b) Ons word ook daarop voorberei dat almal nie ontvanklik is vir hierdie “geur wat versprei word” nie. Vir diegene wat Christus verwerp, is dit ‘n “doodsreuk”; en vir gereddes, is dit ‘n “lewensgeur”.

Met hierdie agtergrond, kan ons nou ons fokusteks gebruik om ons beleidsverklaring op te stel:
1. Ons verkondig die woord van God in opregtheid:
- hiervoor wil ons die woord leer ken;
- ons wil eerlik en getrou die woord hanteer;
- ons vertel vir ander omdat ons graag wil.

2. Ons verkondig die woord van God in verbondenheid met Christus:
- ons het ‘n lewende, persoonlike verhouding met die Here;
- ander kan sien en beleef dat ons kinders van God is;
- ons werk saam met die Here in sy koninkryk.

3. Ons verkondig die woord van God in opdrag van God:
- ons verstaan dat ons een groot geleentheid het om deel van God se werk te wees;
- dit is vir ons lekker om God se opdragte uit te voer;
- Christen-wees maak ons vry van die las van godsdienstigheid.

4. Ons verkondig die woord van God in verantwoordelikheid aan God:
- ons huil saam met ons Here oor die verlorenes;
- ons besef dat ons met ‘n dubbele maat gemeet word;
- ons leef met ‘n skoon gewete voor die Here.

Doom Charl