Oordenking 14 Desember 2014

Om Hom sonder vrees te dien

"... dat ons ... Hom onbevrees kan dien in vroomheid en opregtheid al die dae van ons lewe.” (Lukas 1:73 tot 75)

 God het sy Allerbeste vir ons gegee met die volmaakte verlossing wat Jesus vir ons op aarde kom voltooi het. Hoe kan ons dit die beste Kersfees ooit vir Jesus maak? Hoe en waar en vir wie gaan jy jouself beskikbaar stel? Die beste Kersfees ooit, sal gaan oor wie Jesus is. In die raak leef van jou eie geringheid voor God, word Jesus die Grootse Een in Kersfees 2014.

 Ons is besig om te kyk na die Lukas Evangelie se weergawe van die Jesus-geboorte. Vir Lukas is die geboorte van Johannes die Doper, as wegbereider vir Jesus se geboorte, ‘n baie belangrike deel van die vertelling. Op ‘n gevorderde leeftyd word Elisabet swanger. Haar priesterman, Sagaria, besing die wonder van Jesus wat sou kom en die geboorte van hulle eie seun, Johannes, in ‘n loflied.

God se grootheid word besing omdat Hy die Jode se verwagting van ‘n Verlosser beantwoord. Oor baie geslagte is hierdie verlange na die Messias lewendig gehou. Maar Sagaria se eie seun sal ‘n uiters belangrike rol speel in die voorbereiding van Jesus se koms. Johannes die Doper sal reeds spesifieke waarhede bekend maak, voordat Jesus daarop sal voortbou.

 Die beste Kersfees ooit, sal onder andere beteken dat elkeen van ons, soos asof vir ‘n eerste keer, die grootheid van God se genade, wat in Jesus self vir ons ‘n werklikheid is, sal uitleef. Nooit kan enige een van ons sê dat ons reeds die hoogtepunt van erkenning aan God bereik het nie. Daar sal jaar na jaar, Kersfees na Kersfees, vir ons die ruimte wees om te verbeter, te groei, te vorder, te klim. Die ruimte vir hierdie vordering jaar na jaar, kan slegs wees in wie God besig is om in ons te word.

 Op pad na die beste Kersfees ooit, verdwyn alle vrees vir God, en word ons meer en meer met die hoogste ontsag en bewondering vir Hom gevul. In hierdie groeiproses word die behoefte om Hom te dien met opregtheid net al hoe groter en dringender. So sal niemand van ons kan sê dat ek as Jesus-mens dit regkry dat Hy my hele lewe totaal en al oorgeneem het nie – ons hou elkeen ‘n deeltjie vir onsself terug en vergeet selfs groot dele van die dag van Hom.

Johannes die Doper se boodskap voor Jesus se geboorte was, dat Jesus die weg en die waarheid en die lewe is. Maak hierdie Kersfees die beste deur Jesus met groter dringendheid uit te leef as die ENIGSTE WEG TOT DIE LEWE !!!

Oordenking 7 Desember 2014

Om gering voor God te lewe

"... omdat Hy na my in my geringheid omgesien het.” (Lukas 1:48a)

 Ons maak gereed vir die beste Kersfees ooit! Hoe en waar en vir wie gaan jy jouself beskikbaar stel? Uiters bepalend is die gesindheid waarmee elkeen van ons gereed maak vir dié Jesus wat vir ons mens geword het.

 Ons is besig om te kyk na die Lukas Evangelie se weergawe van die Jesus-geboorte. Ons het reeds gehoor hoe die moeder van Jesus, haarself aan die Here beskikbaar stel vir die Heilige Gees se ingrype om swanger te word. Haar familielid Elisabeth is ook swanger met die wegbereider vir Jesus se koms, Johannes die Doper. En so ondersteun die twee swangervrouens mekaar sodat Elisabeth selfs van vreugde uitroep oor die moeder van die Here se Kindjie wat op pad is. Maar dan die merkwaardige “loflied van Maria”:

 Die grootheid van ons Verlosser word besing ... die mag waarmee Hy dinge sal doen ... sy opregte omgee oor geslagte heen ... die krag waarmee Hy in beheer sal wees ... sy passie vir diegene wat swaarkry ... die waarborg dat al die beloftes rondom Hom waar sal word ...

 ... en dit alles in die volgende gesindheid: "... omdat Hy na my in my geringheid omgesien het.”

 Aan meer opregte nederigheid kan ek myself nie indink nie. Die vrou wat geboorte gegee het aan die enigste Verlosser van alle tye, beskou haarself as gering. Sy voel klein vir die voorreg om ma van Jesus te wees. In haar eenvoud begryp sy iets van die buitengewone kontras tussen haar en haar Kind! In die woorde van haar loflied, word daar baie oor die Kindjie in haar gesê en tog ook baie min oor haarself.

 Maar wat Maria oor haarself sê, is van grootse betekenis. Die grootsheid van wie Maria in haar geringheid is, word selfs buite verband geruk deur die ophef wat die Rooms Katolieke Kerk van haar maak. In buite-Bybelse Griekse literatuur is die moeder van God bekend as die Theotokos. Vir ons as Gereformeerdes het sy verseker nie haar bevoorregte posisie kop toe gevat nie. Vir haar het dit baie eerder gegaan oor wie Jesus is.

 Die beste Kersfees ooit, sal gaan oor wie Jesus is. Dit sal veral gaan oor wie Hy is, in kontras met elkeen van ons. In die raak leef van jou eie geringheid voor God, word Jesus die Grootse Een in Kersfees 2014.

Oordenking 30 November 2014

Om tot beskikking van God te wees

"Ek is tot beskikking van die Here.” (Lukas 1:38a)

 Kom ons maak gereed vir die beste Kersfees ooit! Hoekom? Omdat dit elke Jesus-mens se eie wilsbesluit is om nie net te oorleef van jaar tot jaar nie, maar om elke dag met ‘n splinternuwe verwagting te lewe! Ja, nie net oorleef nie, maar meer intens te lewe en met baie groter invloed te lewe. Beplan ‘n spesiale Kersfees, neem nuwe besluite oor Kersfees, wees gereed vir ‘n totale ommekeer deur die Gees van God in jou! Hoe kan hierdie Kersfees die beste ooit vir jou as Jesus-mens wees?

 Kom ons gaan kuier vir ‘n tydjie by die Lukas Evangelie se vertelling rondom die geboorte van Jesus. Die engel Gabriël verskyn aan Maria om haar voor te berei op die geboorte van haar Seuntjie, Jesus. Hy vertel vir haar wie hierdie besondere Kind van haar gaan wees: “Hy sal groot wees en die Seun van die Allerhoogste genoem word. Die Here God sal Hom die troon van sy voorvader Dawid gee, en Hy sal as koning oor die nageslag van Jakob heers tot in ewigheid. Aan sy koningskap sal daar geen einde wees nie.” Maar dan is sy ‘n maagd, wat nog geen seksuele omgang met haar verloofde, Josef, gehad het nie, sodat sy moet hoor: “Die Heilige Gees sal oor jou kom, en die krag van die Allerhoogste sal die lewe in jou wek. Daarom sal die een wat gebore word, heilig genoem word, die Seun van God.” Want let op wat sê die engel: “Niks is vir God onmoontlik nie.”

 Maar dan antwoord Maria met hierdie besonderse woorde: "Ek is tot beskikking van die Here.” Kersfees in hierdie wêreld het onder andere begin met Maria se gewilligheid om beskikbaar te wees vir die geboorte van die Verlosser van alle tye!

Jou en my beste Kersfees kan begin met ons elkeen se gewilligheid om beskikbaar te wees om die Verlosser van alle tye aan die wêreld bekend te maak en uit te leef. Die beste Kersfees ooit gaan oor ‘n nuwe beskikbaarheid vir Jesus self! Slaan ‘n totaal nuwe blaadjie om vir hierdie Kersfees. Laat die Gees toe om jou nuut te laat dink, oor hoe hierdie Kersfees die beste ooit vir Jesus kan wees!

Hoe gaan jy Kersfees deurbring? Waarop gaan jou hooffokus wees? Hoe en waar en vir wie gaan jy jouself beskikbaar stel?

Oordenking 23 November 2014

Om aan God eer te gee

"Is daar niemand anders wat omgedraai het om God die eer te gee ... ?” (Lukas 17:18)

 Hoe dikwels lewe ons nie tussen die twee uiterstes nie: aan die een kant aanvaar ons te veel dinge as vanselfsprekend, en aan die ander kant kan ons voel dat ons nie genoeg waardeer wat ons het nie.  Elke Jesus-mens kan verskillend reageer op die grootste genesing van alle sonde, wat ons gratis en onvoorwaardelik, ontvang het: dit maak geen verskil in ons lewenswyse nie, of ons voel ons kan net nie genoeg doen om dankie te sê vir vergifnis nie.

In Lukas 17 word tien melaatses deur Jesus genees, en net EEN draai om nadat hy genees is, om Jesus te bedank! En dan is hy nog ‘n Samaritaan, die aartsvyande van die Jode! En Jesus se vraag aan die geneesde melaatse: “Was daar nie tien wat gesond gemaak is nie? Waar is die ander nege?”

 Wat is die belangrikste genesing, waarsonder geen mens kan lewe nie? Ja, vergifnis van alle sonde is die grootste genesing wat Jesus alleen deur die gawe van geloof moontlik maak. Hierdie genesing ís reeds vir almal in plek – elkeen moet dit net hoor en aanvaar.

 Waarvoor wil ons na Jesus teruggaan, nadat ons genesing van alle sonde ontvang het?

1.       Om Hom alle eer te gee. Om 24 uur 7 dae 'n week 365 dae van die jaar bewustelik en onbewustelik erkenning aan Hom te gee vir wie Hy vir my persoonlik is. In my innerlike en intieme en unieke belewenis van Hom, groei ek in die weinig wat ek wel van Hom verstaan.

 2.       Om daadwerklik my lewe aan Hom te wy. Deel van my dankie-lewe-vir-vergifnis, is om Hom te soek, te vertrou, te laat oorneem deur sy Gees, te bemin, te ... Nooit is dit genoeg van Hom vir my, alhoewel Hy altyd sy oorvloed vir my beskikbaar het, volgens sy standaarde.

 3.       Om aan die mense in my lewe en op my pad en uit my pad te wys, wie Hy in my lewe is. Hiervoor verander die Gees my denke oor ander. Hiervoor verander my prioriteite van alles en almal in my lewe. Dit raak selfs diegene naaste aan my. Dit raak my beursie. Dit raak my sosiale lewe en vriende.

 Moenie teruggaan na Jesus met die deurbraak van volkome vergifnis om nog van jou eie selfsugtige behoeftes aan Hom oor te laat nie. Hy weet beter wat jy nodig het, sonder dat jy vra!

 86 400 sekondes elke dag omdraai na Jesus om Hom te bedank, dit is om God te eer!

Oordenking 16 November 2014

Om te gee sonder om te ...

"Jy kan jou gelukkig ag dat hulle niks het om jou mee te vergoed nie, want God sal jou vergoed ...” (Lukas 14:14)

 Ons is besig om as Jesus-mense na te dink oor die praktiese effek van ons tweede bekering. Wat  kan ons verwag van hoe die Gees in ons, ons manier van dink en ons leefwyse verander?

 Jesus eet en kuier saam die belangrike mense van sy tyd, iets wat nie juis sy gewoonte was nie. Hy het baie eerder saam met die sukkelaars en siekes tyd deurgebring. Moontlik besef ons nie hoe groot die kloof tussen ryk en arm, tussen die gesienes en die agtergeblewenes in die Bybelse tyd was nie. Amper soos die verskil tussen die omstandighede in Woodhill Golflandgoed in die ooste van Pretoria en Refilwe nedersetting by Cullinan.

Die vooraanstaandes was baie eisend om die heel beste sitplekke in te neem by die samekoms van belangrike mense. Daar was 'n vasgestelde protokol waarvolgens die kerkleiers en die geleerdes posisie ingeneem het aan tafel en by ander geleenthede, onder andere soos by troues. Nou vertel Jesus hoe ons juis by sulke geleenthede iets kan ervaar van beskeidenheid en gasvryheid. Maar dit gaan oor baie meer as net die beste plekke by 'n bruilof - dit gaan oor 'n permanente, totaal ander lewensingesteldheid, teenoor alle ander mense, in alle omstandighede.

 Ons redeneer so maklik ons werk hard vir al die voorregte en luukshede wat ons geniet – daarom hoef ons nie daaroor skuldig te voel nie. Of ons redeneer dat, as ons darem net ook uitdeel vir ander wat nie so baie soos ons het nie, dan is ons mos oukei. Moontlik kry meeste van ons dit reg om nie openlik neer te sien op ander nie, solank hulle net nie te veel van ons verwag nie. Dit is darem gerieflik om nie bekommerd te wees oor môre se kos of die volgende vakansie se petrolgeld nie. Meer as 90% ander mense op aarde kan nie dieselfde sê nie.

 Te maklik gee ons voorwaardelik. Te maklik gee ons met die bedoeling om iets terug te kry. Ons nooi julle vir ete sodat julle ons kan terug nooi, of ons nooi net mense wat kan terug nooi. Nog erger, ek gee en doen vir die Here, want Hy kan so baie terug doen en Hy kan so baie vir ons gee.

 Mag die Gees ons omvorm om te gee sonder om te ... só gee Jesus!

Oordenking 9 November 2014

Ek is vergewe!

“Het nie een van hulle die oordeel oor jou voltrek nie?  ... Ek doen dit ook nie.” (Johannes 8:10 en 11)

 Die resultaat van die Gees van God se werk in elke Jesus-mens, is net onbeskryflik bevrydend. Soos wat ons die Gees toelaat om al hoe meer ons gedrag te bepaal, kyk ons met totaal ander oë na elke mens op hierdie aarde. Ja, ons kyk deur Jesus se genade-gevulde oë, nie-veroordelend na elke sondaar en elke skuldenaar en elke boef. Die vrug van die Gees is, om met ‘n nuwe hart onvoorwaardelike vergewensgesindheid teenoor alle mense te openbaar!

 ‘n Vrou, wat die groot sonde van seksuele ontrou in haar huwelik gepleeg het, en in amper alle mense se oë sleg en verdoem is, word na Jesus gebring. Dis juis die oënskynlike onskuldige kerkleiers wat met ‘n gesindheid van veroordeling, Jesus self probeer plaas in die beskuldigde bank. In Jesus se tyd was owerspel met die doodgooi van klippe strafbaar - vandag nog word hierdie tipe oortreding steeds figuurlik met steniging gestraf.

 Dan skryf Jesus iets op die grond. Vir eeue sedertdien, word bespiegel wat Jesus geskryf het. Hy het eintlik twee keer iets geskrywe op die grond. Moontlik die eerste keer ‘n boodskap aan die aanklaers, wie Jesus uitnooi om die eerste klip te gooi. Dalk was die tweede boodskap aan die veroordeelde vrou gerig. Ons weet nie. Maar nadat Jesus op die grond geskrywe het, is niemand bereid om ‘n klip te gooi nie en vertrek die aanklaers een vir een. Ek raai Jesus kon vir die vrou geskrywe het: “Jy is vergewe!”

 Sonder enige teenprestasie van die oortreder, sonder enige skuldbelydenis, sonder enige verduideliking deur die sondaar, spreek Jesus haar vry. Net die positiewe aanmoediging om nie meer te sondig nie. Die nie-veroordelende optrede van Jesus, het ‘n nuwe lewe vir ‘n verworpene tot gevolg. Sonde-oorwinning volg op vergifnis en vryspraak.

 Die vermoë om mekaar nie te veroordeel nie, is die werking van die Gees in ons. Net so is dieselfde Gees in ons besig om ons lewensbenadering te herprogrammeer, sodat sonde al hoe minder ‘n rol in ons lewe speel. Soos wat elke Jesus-mens ontdek: “Ek is vergewe!”, net so groei ons daarin om vir elke ander mens op aarde te kan sê: “Jy is vergewe!” Vergifnis maak vry: dit bevry myself én is bevrydend teenoor ander mense.

Oordenking 2 November 2014

Om vrugte te dra

“Maar die tuinier antwoord: Meneer, laat hom nog hierdie jaar staan. Ek sal die grond rondom hom omspit en bemes.” (Lukas 13:8)

 So maklik dink ons Jesus-mense dat dit met ons eie inspanning is dat ons vrugte dra wat by ons bekering pas. So maklik word die dinge wat ons vir die Here doen 'n las en plig. Die wonderlike dinge wat ons vir die Here doen, word maklik iets om mee te spog. Ons het dan tyd en geld opgeoffer. Bewustelik en onbewustelik verdien ons krediete agter ons goeie naam!

 In die gelykenis van onvrugbare vyeboom leer ons egter iets totaal anders. Hierdie vyeboom staan in die eienaar se wingerd geplant. Vir drie jaar soek hy elke jaar in vyetyd vrugte aan die boom en dan is daar niks. Nou gee die eienaar opdrag aan die tuinier om die vyeboom sonder vrugte uit te kap, want dit put net die grond uit. Die tuinier vra grasie, ja, nog 'n kans om iets aan die vrugtelose boom te doen. Die tuinier neem verantwoordelikheid, vra nog 'n jaar kans om, om te spit en te bemes.

Ons enigste God is die eienaar van die wingerd en die vyeboom daarin. Die vyeboom is simbool vir ons as Jesus-mense. Ons staan in God se wingerd geplant. Jesus is die tuinier wat deur die Gees van God verantwoordelikheid neem vir die wingerd met die vyeboom in. Die Tuinier met 'n hoofletter werk in die wingerd van God. Hy sorg dat dit omgespit en bemes word, sodat die vrugtebome vrugte kan dra. Geen vrugteboom is in staat om sonder die Tuinier se ingryping vrugte te dra nie.

 Wat beteken dit vir ons? Ons kan net seker maak ons staan geplant in God se wingerd, daar wil ons wees met alles in ons. En binne die kragveld van die Gees se werk, sal daar vrug wees! Soms gaan die "omspit en bemes" met pyn en seerkry gepaard. Ander kere is dit pure plesier om te ervaar dat daar net die wonderlikste dinge deur ons gebeur, sonder enige inspanning deur ons.

 Die verrassing is dus, dat vrug dra in God se koninkryk 'n Gees-werking is, solank ons net in die wingerd is.

Oordenking 26 Oktober 2014

Die impak van elke Jesus-mens

“Soos die Vader My gestuur het, stuur Ek julle ook.” (Johannes 20:21)

Die groot uitdaging wat elkeen van ons Jesus-mense elke dag het, is om 'n impak in God se koninkryk te maak.

Hiervoor sê die opgestane Jesus, "ontvang die Heilige Gees"! Dit beteken elkeen van ons ontvang die beste en volledige hulp van God self met sy Gees in ons. En dit is met een spesifieke doel, om 'n impak in God se koninkryk te maak. Elkeen word gestuur om 'n impak te maak deur liefde, vrede en vergifnis vir ander spontaan te leef. Hoe kan ons dit doen?

1. Ons leef tussen ander mense wat bang, onseker en/of verlore is of voel - self kan ons ook so voel. Ons leef agter geslote deure en hekke, misdaad bedreig ons almal op een of ander wyse. Daar is so baie wat ons leefwêreld deurmekaar maak, dinge verander soms baie vinnig en die toekoms lyk baie onseker. Te veel beleef ons die agteruitgang op so baie fronte  in die samelewing en dit maak ons moedeloos. Op te veel terreine is dit sigbaar dat mense sonder Jesus leef en nie eers skaam is daaroor nie. Hiermee word ons daagliks gekonfronteer.

2. MAAR ons het Jesus, ons volmaakte Verlosser, wat volledig vergifnis van sonde vir alle mense is - hierdie waarheid staan op ons enigste Rots! Ons elkeen se persoonlike redding is slegs en alleen gebou op hierdie onverdiende guns van ons Here. Hierdie guns is vir alle mense beskikbaar, ongeag wie of wat die omstandighede is. En die enigste wyse waarop verlore en onseker en bang mense met die liefde van ons God in aanraking kan kom, is deur ons lewe en deur ons woorde. Geen ander waarheid, as die waarheid van God se liefde vir alle mense, kan groter impak hê op die omstandighede waarmee ons elke dag gekonfronteer word nie.

3. Daarom kan elke Jesus-mens vrymoedig, met liefde en met die gawes wat elkeen het, soos dit op ons pad kom, vrede en vergifnis leef en vertel. Ons het die geleenthede om die allerbeste nuus van Jesus se liefdevolle opoffering vir almal, nie net te leef nie, maar ook verder uit te dra. Waar ek en jy elke dag besig is met ons dagtaak tussen ander mense, is elkeen van ons die kanaal van Jesus-liefde na verwarde en verlore mense.

Ons Here wil jou baie graag gebruik om ‘n impak te maak ter wille van sy koninkryk – jy is reeds aan diens!

Oordenking 12 Oktober 2014

Elke Jesus-mens se tweede bekering!

“... en toe hy hom sien, het hy hom innig jammer gekry.” (Lukas 10:33b)

Ons het reeds op verskeie maniere beskrywe wat dit beteken om ‘n Jesus-mens te word. ‘n Jesus-mens leef God elke dag raak in die gewone dinge. ‘n Jesus-mens het die genadige belewenis dat vergifnis volledig in plek is op grond van Jesus se volmaakte offer aan die kruis. ‘n Jesus-mens se lewe word deur die Heilige Gees gevorm en beheer. En so kan daar nog baie beskrywings wees van hoe jy ‘n Jesus-mens word. Kom ons noem hierdie soort beskrywings die eerste bekering wat plaasvind.

Maar nadat jy ‘n Jesus-mens geword het, wil die Gees van God in jou, van jou meer maak soos wat Jesus reeds in jou is. Kom ons noem hierdie vormingsproses deur die Gees die tweede bekering. Hierdie tweede bekering kan op baie maniere beskrywe word, soos heiligmaking, dissipelskap, meer en meer soos Jesus, geestelike groei, ensovoorts.

En net soos die eerste bekering ‘n wilsbesluit van elke mens is, is die tweede bekering letterlik ‘n daaglikse wilsbesluit van samewerking met die Gees van God in jou. Ek en jy het ‘n keuse om die Gees toe te laat om anders te dink en nuut te lewe. Ons eerste bekering bespreek ons plekkie in die hemel, maar op pad hemel toe bied ons tweede bekering vir ons geleentheid om reeds hemel op aarde te belewe deur ‘n bepaalde Gees-beheerde lewenswyse.

Hierdie Gees-beheerde tweede bekering behels onder andere die wyse waarop ons oë oopgaan vir die nood langs die pad elke dag. Dat ons soos die Barmhartige Samaritaan verby ons eie voorkeure en gemaksug, die seer van ander sal sien, hulle innig jammer kry en prakties iets daaraan doen. Ons eerste bekering staan vas op Jesus se onvoorwaardelike liefde en genade, en net so kan ons onvoorwaardelik liefde leef in ons stukkende wêreld. Vrywillige gehoorsaamheid aan die wil van God wat die Gees op my hart skrywe, is bevrydend!

Tweede bekering vir Jesus-mense het te doen met mense met wie ek elke dag in aanraking kom, mense wat net soos elke Jesus-mens ook probleme en krisisse belewe. Een bedelaar vertel vir die ander bedelaar waar om die brood/Brood van die lewe/Lewe te kry. In my eie rykdom/Rykdom verlig ek die armoede/Armoede van ander. In my eie seerkry en Gees-genesing, gee ek salf/Salf vir die wonde van die beseerdes langs my pad.

Geniet net elke sekonde van jou tweede bekering!

Oordenking 28 September 2014

Hoop wat groei en groei

Tema 7:  Ek verwag Hom binnekort

“... Hy is geduldig met julle, omdat Hy nie wil hê dat iemand verlore gaan nie.” (2 Petrus 3:9b)

Ons kan so maklik ongeduldig raak as dinge nie vinnig genoeg gebeur na ons sin nie. Of dalk voel ons soms net lui en traak-my-nie-agtig. Of ons stel maklik uit om iets klaar te kry, want môre is nog ‘n dag. Of ons kan sommer net nie omgee wat gebeur nie, net geen bekommernis oor die uitkoms van ‘n saak nie. Al hierdie moontlikhede, en dalk sommer nog ander minder positiewe uitkomste, kan vir ons persoonlike lewe geld, maar ongelukkig is dit ook baie keer waar binne die kerk ...

... en ons Here is glad nie so nie!!!

Ons Here het sy eie tydsberekening: duisend jaar is soos een dag en een dag soos duisend jaar – niemand kan die tyd van sy weer kom na die aarde bereken volgens tyd nie. Hy slaap nooit nie en neem nooit verlof nie. Hy maak altyd die goeie werk, wat Hy reeds met Jesus in ons deur sy Gees begin het, klaar – volgens sy volmaakte tydsberekening. Hy is 100% betrokke by die volmaakte uitkoms van elke saak wat sy koninkryk raak. Wat sal die voorwaarde wees dat jy ook volledig deel is van die volmaakte uitkoms vir sy koninkryk?

Wees ‘n Jesus-mens met hoop, dit wil sê, kry ‘n positiewe uitkyk op die lewe vandag by die Bron van hoop, en daar sal vir jou ‘n beter môre wees!

Hoe onrustig voel jy oor die lewe in die algemeen? Hoeveel dringendheid ervaar jy as Jesus-mens dat dinge moet regkom? Hoe ernstig neem jy jou roeping om ander van Jesus te vertel? Hoe baie lê jy wakker in die nag oor die moontlikheid dat iemand naby aan jou verlore sal gaan sonder Jesus? Hoe direk raak die stukkende wêreld waarin ons elke dag moet oorleef, vir jou?

Ons Jesus is onrustig oor die verlore wêreld waarin ons is. Hy is dringend, Hy is ernstig, Hy gee regtig om, die stukkende wêreld raak Hom direk. Hy is in jou deur sy Gees en wil in jou dieselfde erns laat groei om hoop te gee vir elke situasie waarin ons lewe.

Hoe gouer jy met sekerheid ware hoop deur jou laat bring, hoe gouer kom Hy weer!!! Elke Jesus-mens is só reeds deel van die volmaakte voltooiing van God se koninkryk!!!

Oordenking 21 September 2014

Hoop wat groei en groei

Tema 6:  Ek sien ewigheidshoop

“Ek span my in om by die wenstreep te kom, sodat ek die hemelse prys kan behaal waartoe God my geroep het in Christus Jesus.” (Filippense 3:14)

Vir my as Jesus-mens, het hoop daarmee te doen dat ek vandag by God moed sal skep om gereed te wees vir die beter môre wat op ons wag. Moontlik stem dit ooreen met ander beskrywings van hoop wat ek raak gelees het tydens hierdie reeks van hoop waarmee ons besig is. Hoop het verseker te doen met ‘n positiewe uitkyk op die toekoms.

In die teologie word baie gemaak van die “reeds” en die “nog nie”, bedoelende dat daar reeds baie beloftes van die Bybel waar geword het, maar dat daar ook beloftes in die Bybel is wat nog nie waar geword het nie. So kan ons met geloofsekerheid bely dat Jesus as enigste Seun van God reeds volledig ons verlossing bewerk het, maar dat ons nog nie die volle betekenis daarvan duskant die graf ervaar nie. Of dat ons reeds 100% vergewe is vir alle sonde, maar nog nie 100% oorwinning in ons eie lewe oor sonde het nie. Of dat ons reeds ‘n vaste plek in die hemel het, maar nog nie in die hemel is nie. So is daar nog baie ander “reeds” en “nog nie” waarhede vir ons as Jesus-mense.

Nou gebruik Paulus die beeldspraak van ‘n wedloop waarmee ons reeds besig is. Jesus-mense het reeds weggespring in die ewigheidswedloop die oomblik toe ons Jesus in ons ingenooi het, in reaksie op sy roepstem. Tydens hierdie wedloop is daar hindernisse wat baie moeilik is om oor te kom en wat ons moedeloos maak. Maar ons  moedig mekaar, en ander wat saam hardloop aan, om moed te hou en veral gefokus te bly op die eindstreep. Tydens die wedloop is ons nog nie sonder swaarkry nie en is daar nog nie volkome rus nie, maar die vooruitsig van geen swaarkry en ware ewigheidsrus, help dat ons reeds aanhou en vasbyt.

Die wenstreep wat reeds wag beteken die hemelse prys vir elkeen wat daar uitkom. En die enigste manier om by die wenstreep en die hemelse prys (dit is die nog nie) te kom, is deur die krag en die uithouvermoë wat die Heilige Gees reeds in ons geloofspiere gee. Hierdie inspanning het alles te doen met ‘n volkome afhanklikheid van die Gees in ons – en so is ons as Jesus-mense reeds op pad hemel toe! Dit is reeds ons ewigheidshoop!

Oordenking 14 September 2014

Hoop wat groei en groei

Tema 5:  Ek dra hoop uit

“Mag God ... julle vervul, sodat julle hoop al hoe sterker kan word deur die krag van die Heilige Gees.” (Romeine 15:13)

Wat kan ek as Jesus-mens doen om hoop uit te dra?

1.       Laat die Gees op jou hart skrywe wie die Bron van hoop vir jou, in jou eie lewe is!

 

2.       Laat die Gees jou oë oopmaak vir diegene wat nie sterk is in die geloof nie, en begin self iets daaraan doen om ‘n verskil in mense se lewens te maak.

 

3.       Laat die Gees jou selfloos iets goed laat doen aan jou naaste, juis omdat die Bron van hoop dit reeds vir jou doen.

4.       Laat die Gees toe om die voorbeeld van Christus jou hoogste motivering te maak, om ‘n draer van hoop na ‘n stukkende wêreld te wees.

5.       Laat die Gees-geïnspireerde-Skrif vir jou en ander standvastigheid en bemoediging bied.

 

6.       Laat die Gees vir jou ‘n gesindheid van eengesindheid onder mede-Jesus-mense bewerk.

7.       Laat die Gees jou vul met lof aan ons enigste Bron van hoop, op so ‘n wyse dat ander Hom in jou kan sien.

8.       Laat die Gees toe om alle vooroordele teenoor alle ander mense te verwyder, want Christus aanvaar jou onvoorwaardelik.

9.       Laat die Gees van jou ‘n dienaar maak in belang van sy koninkryk, en nie jou eie koninkryk nie.

10.   Laat die Gees jou ‘n draer maak van die beloftes van hoop wat oor geslagte heen oorgedra is met ‘n vaste sekerheid in die Bron van hoop.

 

11.   Laat die Gees vir jou egte vreugde gee in die uitdra van hoop.

 

12.   Mag die Gees jou vul met ware Goddelike vrede, omdat jy ‘n draer van hoop is.

 

Werk saam met die Gees om waarlik ‘n draer van hoop te wees!

Oordenking 31 Augustus 2014

Hoop wat groei en groei

Tema 3:  Die Bron van my hoop

“Hy is my helper en my God!” (Psalm 42:12)

Ware hoop het alleen met God te doen!

Hoe dink ek oor Hom, as daar steeds hoopdiewe is: twyfel, vyande, mense wat my in die steek laat, geldprobleme, siekte, versteurde verhoudings, of ander moontlike ellende? Hoe kan ware hoop vir my iets beteken, indien daar steeds moeilike omstandighede is om te hanteer?

Die skrywer van Psalm 42 is in ‘n hooplose situasie: “Dag en nag is ek in trane ...” (vers 4); die vyande vra en spot: “En waar is jou God nou?” (verse 4,11); ‘n paar keer vra hy: “Waarom is ek so in vertwyfeling?” (verse 6,7,12); “... waarom het U my vergeet?” (vers 10). Ons weet nie presies wat die skrywer se ellende is nie, maar dit is duidelik dat dit baie sleg gaan. Én daar verander niks aan hierdie slegte omstandighede terwyl hy sekere hoopvolle ontdekkings maak nie.

Terwyl dinge steeds hooploos is, dink hy terug aan die verloop van sy lewe. Hy dink aan die verlede en hoe hy na die Here gegaan het toe dinge moeilik was. Hy dink terug aan die tye wat daar fees gevier is en die redes vir die blydskap in sy lewe. En die verrassende ontdekking: hy het dit reggekry om fees te vier, al was daar storms. En dit voel asof “U het golf na golf oor my laat slaan.” (vers 8)

MAAR die Bron van hoop, is steeds sy helper en sy God ...

... vir my en jou bly God steeds wie Hy is, niks of niemand kan dit verander nie: Hy is die lewende God, Hy is my helper en my God, my Rots, my skuiling!

Vandag leef ek Hom raak, al lyk dinge hoe sleg, want “tog sal die Here weer op ‘n dag sy trou laat blyk ...” (vers 9). “Ja, ek sal weer vir Hom ‘n loflied sing.” (vers 12)

Hier is die geleentheid vir elkeen wat hooploos voel: leef jou eie persoonlike Bron van hoop raak in jou eie unieke ellende, én vertel vir ander hooplose mense Wie Hy vir jou is! Raak eerstehands bewus van jou eie woorde om Hom te beskrywe, of praat die Psalmskrywer na in die woorde in sy Woord oor wie Hy vir jou is.

Laat die Gees op jou hart skrywe wie die Bron van hoop vir jou, in jou eie lewe is!

Oordenking 24 Augustus 2014

Hoop wat groei en groei

Tema 2:  Ek soek ware hoop

“... om dié rede bly ek hoop: deur die liefde van die Here het ons nie vergaan nie ...” (Klaagliedere 3:21b-22a)

Die werklikheid waarmee ons elke dag gekonfronteer word, is nie altyd maklik nie. Sonder dat ons dikwels ‘n keuse het, loop dinge verkeerd en het ons rede om moedeloos te wees. Daar is ook mense wat voorgee dat alles “oukei” en “fine” is, en dan is dit alles behalwe so. Wat is die antwoord vir Jesus-mense om wel positief te wees oor die lewe, ten spyte van ...

Die boek Klaagliedere het ontstaan in ‘n tyd wat dit regtig baie sleg gegaan het met die volk van die Here in die Ou Testament. Die tempel in Jerusalem is geplunder en afgebreek tydens ‘n inval deur die Babiloniërs in die jaar 587 voor Christus. Hulle koning word onttroon, en die leiers en geleerdes onder die volk, word in ballingskap weggevoer. Wat het nou geword van hulle God? Nou is die troon van Dawid leeg! Die volk verloor hulle tempel, hulle koning en hulle land! Waar is God? Waar is ons hoop?

Hoor hoe erg gaan dit: “Ek is die man wat ellende belewe het ... (die Here) weier om my gebed te verhoor ... ek het al vergeet van voorspoed ... “ (aanhalings uit Klaagliedere 3). Hier word God beskuldig van alles wat verkeerd loop, want die hoop-lose skrywer het nog altyd daaraan vasgehou dat Hy alles voorspoedig sal laat verloop. En sonder dat alles weer oornag herstel, ja, eintlik is dinge steeds ellendig, kan hy sê: “Die Here is goed vir wie op Hom bly hoop ... ontferm Hy Hom weer, want sy liefde is groot ... (ook uit Klaagliedere 3).

Ons het reeds met mekaar ooreengekom dat ons besef dat niemand van ons enige hoop kan plaas op geld om voorspoed te bring nie, vir niemand is goeie gesondheid gewaarborg nie, en dat ons nie op mense ons vertroue kan plaas vir ‘n vreugdevolle en kommerlose lewe nie. Die groot ontdekking in die lewe, is dat ten spyte van wat ook al verkeerd loop in jou lewe, niks aan God se kant verander nie. Hy bly getrou en Hy het ons lief. En dit is net so, die verlede wys wie Hy is. Ons geloof in Hom bevestig sy liefde vir ons. Hy is ‘n Man van sy Woord, ons hou vas aan sy beloftes.

Ware hoop het alleen met God te doen!

Oordenking 17 Augustus 2014

Hoop wat groei en groei

Tema 1:  Ek kan nie sonder hoop lewe nie

“Ons oog is nie op die sigbare dinge gerig nie, maar op die onsigbare ...” (2 Korintiërs 4: 18a)

Vir die volgende sewe weke gaan ons ‘n reeks oor “Hoop” volg saam met ongeveer 80 ander gemeentes in die land. Vanuit soveel rigtings hoor ons die geluide dat ons mense moedeloos is en hoor ons die verkeerde slimmighede as oplossing vir “alles” wat verkeerd loop. Kom ontdek saam met ons as Jesus-mense wat dit beteken “om kelners van hoop” in vandag se moeilike tye te wees.

Paulus hou reken met die werklikheid waarmee ons elke dag gekonfronteer word: terneergedruk,  radeloos, vervolg, op die grond neergegooi, uiterlik besig om te vergaan. Ons sal hierdie redes tot moedeloosheid ook ander name kan gee: finansiële druk, spanning in verhoudings, gesondheidsprobleme, die bedreiging van misdaad in ons land, en al die uitdagings waarmee ons daagliks te doen kry. Hierdie is alles werklike of potensiële bedreigings wat ons hoop steel en ons rede gee om moedeloos te wees.

Maar so kry ons in die Woord van God die enigste oplossing vir ons hooploosheid (eie woord), naamlik “ons het dieselfde Gees wat geloof wek ...” (2 Korintiërs 4:13). Alleen in ‘n definitiewe lewende verhouding met Jesus deur die inwonende werk van die Heilige Gees, glo ons in die nabyheid en teenwoordigheid van die onsigbare God in ons. Jesus het sy lewe vir ons redding gegee en daarmee kry ons deur geloof ‘n onlosmaaklike en onvoorwaardelike verbintenis met Hom. En alleen met hierdie verbintenis met die (weereens) onsigbare Jesus, kyk ons met ander oë na ons eie lewe en die sigbare uitdagings rondom ons.

Die Fondament vir hoop wat groei en groei, is Jesus self in ons. En om op hierdie Fondament te bou, is die enigste manier om hoop te vind en hoop uit te deel. Kom ons as Jesus-mense word kelners van hoop wat vir ander mense moed inpraat met die regte Vertrekpunt. Let wel hoofletter “V”, want dit kan nét ons Here in ons wees, wat die Bron van hoop is.

So baie mense vra moedeloos: “Is daar nog hoop vir my, Here?” En dan kom die antwoord in dieselfde vers: “U is my enigste hoop.” (Psalm 39:8)

Oordenking 10 Augustus 2014

Riglyne vir stilte in jou hart

“Ons lewe deur die Gees; laat die Gees nou ook ons gedrag bepaal.” (Galasiërs 5: 25)

Ons is besig met praktiese lewenslesse vir Jesus-mense. Vandag wil ons fokus op die plek van stilte in die lewe van elke Jesus-mens.

Waarom is stilte belangrik?

·         So kan jy God beter raak lewe.

·         Ons lewens is dikwels so besig, dat dit nodig is om spesifieke tyd by sy voete deur te bring.

·         Onder andere ontdek jy beter, hoe geliefd jy in God se oë is.

Praktiese inrig van stilte:

Kies ‘n plek waar en ‘n tyd wanneer, niks of niemand jou in die stilte sal steur nie. Doen dit vrywillig en soos wat die geleentheid ontstaan. Kies om tyd daarvoor te maak.

Riglyne vir stilte:

·         Ontspan, raak rustig en vergeet van tyd.

·         Maak jou oë toe en sluit jou af van alles om jou.

·         Vra die Here om jou bewus te maak van Hom.

·         Ontspan rondom enige gedagte wat by jou opkom wat met God te doen het.

·         Laat enige gedagte oor God so lank as moontlik jou besig hou.

·         Sodra jou gedagtes begin dwaal, wees ingestel op ‘n volgende gedagte oor God.

·         Laat hierdie proses rustig toe om die stilte te vul.