Oordenking 28 Julie 2013

Oordenking 28 Julie 2013

Hooftema: Jesus sê wat?

Sleutel 2: Die sleutel tot verbintenis

“Iemand wat die hand aan die ploeg slaan en aanhou omkyk na wat agter is, is nie geskik vir die koninkryk van God nie.” (Lukas 9:62)

‘n Gelukkige lewe is alleen moontlik deur in totale afhanklikheid van God te lewe, dit was ons eerste sleutel tot ‘n Jesus-mens-lewe. Die tweede sleutel vra jóú 100%. Bedoelende as jy God 100% nodig het om gelukkig te wees, vra Hy 100% van jóú!

‘n Jesus-lewe vra alles, maar gee ook alles. Jy kan nie vir Jesus halfhartig volg en dien nie. Jy kan nie ‘n agterdeur oop hou om nog in die wêreld soos die wêreld te lewe nie. God laat nie met Hom onderhandel dat jy die beste van twee wêrelde kan probeer geniet nie. Jy kan nie met een voet in die koninkryk van God staan en met die ander voet vastrap in die vernietigende genot van die goddelose wêreld nie. Jy kan ook nie voorgee dat jy finaal en volledig gekies het vir ‘n Jesus-lewe, maar eintlik is jou hart nie daarin nie. Jy kan nie “probeer om reg te lewe” nie, jy gaan dit nie regkry nie. Self “probeer” sonder God, is dieselfde as om terug te verlang na ‘n lewe sonder Jesus.

In ons teksvers in Lukas 9 is Jesus aan die woord oor die verskonings wat daar kan wees om Hom nie onmiddellik en volledig te volg nie. Jakkalse en voëls het blyplekke, maar Jesus self het nie op aarde ‘n vaste blyplek nie – want so kan Hy 100% gee. Die tweede verskoning klink so geldig, die persoon wil eers sy pa gaan begrawe – om Jesus te verkondig is selfs belangriker as hierdie familie-verantwoordelikheid. Die eise wat Jesus stel is meer bindend en strenger as enige familiebande, Hy duld geen halfhartige navolging nie. Iemand terugkyk terwyl hy ploeg, doen dit skeef en oneffektief – elke kerkmens wat terugverlang na die lewe sonder Jesus, is nog nie ‘n Jesus-mens nie!

Jesus vra ‘n 100% oorgawe aan Hom, Hy vra jou heel beste, Hy vra dit onmiddellik ...

... dit beteken: HY GEE ALLES VIR JOU sodat:
• Jy Hom 100% sal volg;
• Jy jou beste vir Hom sal doen;
• Jy jou beste vir Hom sal gee;
• Jy jou hele lewe aan Hom sal wy;
• Jy Hom bo alles sal lief hê;
• Jy Hom 24 uur per dag en 7 dae van die week sal dien; en
• Jy die heel meeste uitsien om Hóm in die hemel te sien!

Doom Charl