Oordenking 17 Julie 2011

Oordenking 17 Julie 2011
Aanneemlik vir U, Here, asseblief!
“Mag wat ek sê en wat ek dink tog vir U aanneemlik wees, Here, my Rots en my Verlosser.” (Psalm 19:15)
Hoekom loop so baie van ons met skuldgevoelens rond? Hoekom dink so baie mense hulle is nie goed genoeg vir die Here nie? Wonder ons nie almal of ons aan die vereistes van die Here voldoen nie? Tussen ons gewete en sy gebooie voel ons ellendig skuldig!
Net in die afgelope week loop ek by verskillende geleenthede twee mense raak wat spontaan begin verduidelik hoekom hulle Sondag moes gewerk het, so asof hulle daarmee wil bely dat hulle die sabbatswet oortree het en dat dit nou ewig teen hulle name opgeteken gaan staan. Het die Heilige Gees dan nog nie sy nuwe wet op hulle harte geskrywe wat hulle vry maak nie? Is Sondag dan nie opstandingsdag vir hulle nie, of het hulle nog by die Joodse sabbat vasgeval? Sondag is allermins bedoel om ons skuldig te laat voel, eerder bevry en vol lewe en verryk te laat voel, vol nuwe lewe vir die werksweek wat begin! Daarom is dit goeie gebruik om ons geestelike batterye te laai deur eredienste by te woon en liggaamlik te herstel vir die week wat begin.
Terug by Psalm 19: hoe sê en dink ek wat aanneemlik is vir die Here? Twee maniere:
Eerstens: “Die hemel getuig ... sonder woorde ...”
So eg uit ons eie belydenis vertel God se skepping vir ons wie God is en wat vir Hom belangrik is. “Dit is immers voor ons oë soos ‘n mooi boek waarin alle skepsels, groot en klein, die letters is wat ons die onsigbare dinge van God, naamlik sy ewige krag en Goddelikheid, duidelik laat sien ...” (NGB art 2). Niemand het ‘n verskoning dat hulle nie weet wie God is nie, die skepping bewys God (Rom. 1:12). Vir ons as gelowiges laat die skepping ons net meer en meer in verwondering staan voor God. En dit begin sommer by die onmoontlike herhaalbare wonder van ons eie skepsel wees!
Tweedens: “Die woord van die Here ... gee insig ...”
En dan het ek ‘n leerbare gees nodig, ‘n behoefte om die Here te ken en beter te leer ken. En daarvoor het ek sy Woord. ‘n Bevrydende Woord, lewe-gewende Woord, nie-veroordelende Woord, verlossende Woord, altyd nuwe Woord, volmaakte Woord, volledige Woord, moeite werd Woord, ... dit is God se Woord oor God self. Sy Gees kom skryf sy Woord op ons harte, en daardie Woord is aanneemlik, want dit kom van Hom. “... maak Hy Hom deur sy ... Woord nog duideliker en meer volkome aan ons bekend ...” (NGB art 2).
Sy Skepping en sy Woord – in soverre dit Syne is en solank dit van Hom kom, is dit vir Hom aanneemlik!
• Hou op skuldig voel: Jesus het jou skuld 100% gedra! Jy IS aanneemlik vir Hom!
• Jy IS goed genoeg vir Hom! Hy skryf sy volmaakte Woord op jou hart.
• Ons Rots en ons Verlosser weerhou ons van onwetende en opsetlike sondes! DANKIE!
Doom Charl