Oordenking 3 Februarie 2013
Jesus-mense weet liefde kom van God
“... want liefde kom van God, en elkeen wat liefhet, is ‘n kind van God en ken God.” (1 Johannes 4:7)
• Jesus-mense ontdek dat Jesus ‘n regte mens is wat self hierdie aardse lewe ervaar het (dit het ons Kersfees gehoor).
• Jesus-mense het die voordeel van Jesus se wondermag aan hulle kant (daarom doen Jesus wondertekens).
• Jesus-mense se ywer vir God is soos ‘n verterende vuur (onthou die tempelreiniging).
• Jesus-mense is wedergebore deur die Heilige Gees (dit het Nikodemus by Jesus gehoor).
• Jesus-mense se dors word deur die Lewende Water geles (die Samaritaanse vrou by Jakob se fontein het dit ontvang).
Nou kan ons beter verstaan:
NB Jesus-mense bestaan in liefde!
Liefde wat van God kom, is ‘n integrale deel van Jesus-mense. Almal wat die guns in God se oë vind om te glo dat Jesus se sterwe en opstanding vir ons die ewige lewe waarborg, word verander in liefde. Hulle begryp wat God-liefde is:
God-liefde word nie aan- en afgeskakel nie; dit is ‘n permanente goddelike bestaansvorm deur die krag van die Heilige Gees; dit is ‘n voelbare en sigbare lewenswyse; dit is ‘n bevrydende en vernuwende manier van lewe; dit is onvoorwaardelik; dit ken geen begin of einde; dit kan nie uitgeput raak nie; dit kan nie met die menslike verstand volledig begryp word nie; dit het geen gelyke in die geskape werklikheid nie; dit kan nie nou al volledig beskrywe word nie...
... want dié liefde, is God self!
En Jesus het vir ons kom wys wie God is. Hoe het Hy dit gedoen?
Hy het die hemelse heerlikheid verlaat, Hy het sy lewe gegee, Hy het die hoogste offer gebring, Hy het die volledige prys vir ons sondevergifnis betaal, Hy het na drie dae uit die dood opgestaan, Hy het opgevaar hemel toe, sy Gees is uitgestort op Pinksterdag ...
Hy het deur sy Gees tot binne-in Jesus-mense gekom, Hy sit God-liefde voort in elkeen van ons wat ons lewens oopmaak vir Hom!
Hierdie God-liefde is wie God is.
Hierdie God-liefde is wie Jesus is.
Hierdie God-liefde is ons Jesus-mense!
Doom Charl
No comments:
Post a Comment
Note: Only a member of this blog may post a comment.