Oordenking 25 Mei 2014

Vertel van Jesus-reeks:  Wanneer vertel ek?

“... daaroor praat as jy in jou huis is en as jy op pad is, as jy gaan slaap en as jy opstaan.” (Deuteronomium 6:7)

Om die wonderlikste, die beste, die grootste nuus aangaande Jesus se verlossing deur woord en daad in liefde aan almal te vertel – wanneer vertel ek dit vir wie in watter omstandighede?

Daar gebeur so ‘n verskeidenheid van dinge in ons eie en mense wat daagliks op ons pad kom, se lewens. Dit kan goeie en slegte dinge wees wat in mense se lewens gebeur. En al hierdie gebeure bied geleenthede om van Jesus te vertel. Ons kan dalk net verras wees hoe ontvanklik mense is om van Jesus te hoor in hulle spesifieke omstandighede.

Kom ons kyk net na drie kategorieë van gebeure in ons daaglikse lewens waar Jesus deel van wil wees:

1.       Eerstens is daar persoonlike omstandighede soos jou eie worsteling met wie jy werklik is en wat maak jy met jou lewe; of jou eie unieke verhouding met God; of jou intieme verhoudingslewe; of wat ook al jou as individu direk raak. Elkeen van ons het een of ander tyd behoefte om met iemand oor een of meer van hierdie persoonlike sake te praat – en Jesus sal altyd deel wil wees van so ‘n gesprek.

 

2.       Dan is daar omstandighede wat meer met ander mense in jou lewe te doen het: dink aan jou werk, skool of studies waar jy ander mense nodig het en met hulle oor die weg moet kom; dink aan jou gesin en familie wat ons almal op een of ander wyse raak; dink aan jou vriendekring en die invloed wat hulle op jou het. Almal van ons is altyd op een of ander wyse aan ander mense gekoppel – goed of sleg, en dit raak ons lewe, en dit bied geleentheid om Jesus daarvan deel te maak.

 

3.       Die ander groot lewensuitdaging wat ons almal in die gesig moet kyk, is die groter prentjie van ander mense of omstandighede wat ons lewens direk beïnvloed. Hier is die politiek, die ekonomie, die weerpatrone en ander globale invloede ter sprake. Ons teenwoordige Jesus wil ook daarin geken wees en deel wees van hoe ons hierdie sake beredeneer.

Jesus bepaal nie ons omstandighede nie, Hy veroorsaak nie die probleme wat ons moet hanteer nie, Hy neem ook nie altyd die probleme weg nie, maar Hy gee ons die geleentheid om met ander oor Hom te praat, wat die omstandighede ook al is.

Oordenking 18 Mei 2014

Vertel van Jesus-reeks:  Vir wie vertel ek?

“Deur die verkondiging van die evangelie is ek in Christus Jesus julle vader.” (1 Korintiërs 4: 15b)

Om die wonderlikste, die beste, die grootste nuus aangaande Jesus se verlossing deur woord en daad in liefde aan almal te vertel -  die voorreg wat elke Jesus-mens het, juis omdat my eie lewe deur Jesus se Gees nuut gemaak word!

Jesus se opdrag was “gaan na die nasies toe ...” (Matteus 28:19) én Hy gee ‘n belofte vir ons: “julle sal krag ontvang wanneer die Heilige Gees oor julle kom, en julle sal my getuies wees ...” (Handelinge 1:8). Paulus sê dat “die verkondiging van die evangelie” maak van hom “vader” oor diegene wat dit hoor (1 Korintiërs 4:15b). Vir wie moet ek as Jesus-mens hierdie baie goeie nuus oor Jesus vertel?

·         Dink aan mense met wie ek elke dag kontak het, soos by die huis, die werk, die skool, op die sportveld, by die winkel, ja, enige plek. Raak bewus dat die Here daagliks mense op ons pad stuur teenoor wie ons kan getuig. Meeste mense met wie ons elke dag te doen kry, het reeds van Jesus gehoor, maar baie van hulle ken Hom nie persoonlik nie. En juis omdat Jesus-mense kan vertel dat ons Hom persoonlik leer ken in ons, kan ons vir ander ook help om ‘n persoonlike vaste verhouding met Hom te hê. In die weke wat kom, wil ons prakties ontdek hoe ons dan vir verskillende mense op ons daaglikse pad, kan vertel van die ware Jesus – en dan sommer in die proses Hom ook nog nader leer ken in ons eie lewe.

 

·         Dan kry sommige van ons die geleentheid om verder te gaan, na ver plekke – en ons hoef nie amptelike sendelinge te wees wat deur die kerk gestuur word, om dit te doen nie. Dit is wel nodig dat daar steeds sendelinge is wat na ander lande gaan om vir ander van Jesus te gaan vertel. So baie van ons reis deesdae na ander lande of gaan werk vir tye op ver plekke. Dink net aan die baie Suid-Afrikaners wat geëmigreer het, en baie van hulle ken Jesus – moedig hulle aan ons Jesus te leef daar ver in die vreemde.

Daar is dus twee groepe om van Jesus te vertel: die mense wat elke dag ons pad kruis, én die mense op ver plekke in ander lande, na wie toe ons kan gaan.

Na wie stuur Jesus jou om te vertel?

Oordenking 11 Mei 2014

Om jou Lig te laat skyn

“Julle is die lig vir die wêreld ... Laat julle lig skyn ...” (Matteus 5: 14a en 16a)

Om te verstaan hoe uitsonderlike voorreg dit is om onvoorwaardelik deur God vergewe te word, moet elke Jesus-mens eers besef hoe verlore ons is as gevolg van die sonde. Om te verstaan hoe belangrik die Lig is wat ons laat skyn in hierdie wêreld, moet ons eers besef hoe donker is hierdie wêreld waarin ons is. Hierdie wêreld is donker hoofsaaklik as gevolg van twee faktore: die sonde wat daar in elke mens is en die duiwel wat nog werksaam is totdat Jesus finaal weer kom.

Die sonde sal ‘n faktor bly in alles wat verkeerd loop op hierdie aarde. Ons is almal sondaars wat van nature geneig is om die verkeerde te kies. Jesus-mense is egter sondaars wat vergifnis gewaarborg is op grond van Jesus se verdienste en word deur die Heilige Gees in ons van sonde vry gemaak. Daarteenoor bly nie-Jesus-mense om in die sonde voort te lewe, en dit is nag, want dit bederf die lewe van ander – die voortgaande sonde in verlore mense, is die direkte oorsaak van al die haat en chaos in vandag se wêreld.

Net so is die duiwel steeds ‘n aktiewe bewerker van haat en alle vorme van boosheid. Met Jesus se sterwe aan die kruis, is die Satan vasgebind om slegs met beperkte mag ‘n verwoestende invloed te wees in mense se lewens wat nie aan Jesus behoort nie. Hierdie demoniese werke sal voortgaan totdat Jesus finaal op die wolke verskyn tydens sy finale koms van hierdie wêreld. So tussen die sonde en die duiwel alleen, is daar totale duisternis op hierdie aarde, vandag nog!

MAAR met Jesus, kom die Lig, en die Lig is sterker as die donkerte, sterker as enige ander magte, ook sterkte as enige vorm van demoniese werking. So kom die ware Lig in elke Jesus-mens in, om ons te verlig en finaal alle vorme van duisternis te verdryf. Jesus in ons verdryf die duiwel finaal uit ons, en Jesus kom nie halfhartig of gedeeltelik in ons in nie.

Daarom aan elke Jesus-mens: die donker wêreld waarin ons elke dag veg om oorlewing, smag na die Lig, smag na Jesus, in ons – laat jou Lig skyn! Laat die Gees toe om deur jou die Jesus-Lig in jou, te laat skyn in ander se lewens.

Oordenking 27 April 2014

Om brood wat Lewe gee, uit te deel

“Ek is die brood wat lewe gee. Wie na My toe kom, sal nooit weer honger kry nie ...” (Johannes 6:35)

Daar is waarskynlik baie min van ons wat hier lees, wat ooit werklik honger gely het en nie geweet het waar môre se kos vandaan gaan kom nie. Ek kan my net indink hoe dit moet wees om regtig te voel dat jy wil doodgaan van die honger, en ek praat nie van ‘n besige dag waartydens ons nie tyd gehad het om te eet nie of sulke situasies nie. Aan die ander kant, is daar seker min van ons wat iemand wat vir brood of ietsie te eet vra, sal wegjaag of ten minste ‘n poging aanwend om ‘n regte honger mens te probeer help nie.

Die groot jammerte is dat fisiese honger nie dieselfde is as geestelike honger nie. En die werklikheid is dat ons daagliks met meer geestelik honger mense te doen kry en nie noodwendig dieselfde dringendheid beleef om hulle te help nie. En egte geestelike honger is baie erger as fisiese honger, want dit kan in die uiterste vorm, neerkom om volledig sonder God te lewe. En om sonder God te lewe, is om eintlik “dood’ te wees. Slegs met God is jou lewe, lewe jy werklik.

Maar naas geestelik “dood”-wees, is daar ook ander grade of toestande van geestelike honger: soos om God mis te lewe, veral as daar krisisse in jou lewe is; of om ‘n dieper behoefte aan God te ervaar in jou gewone lewe; of om valslik tevrede te wees met wie God in jou lewe is, dit beteken jy is met minder van Hom in jou tevrede as wat vir jou bedoel is. En so leef baie van ons al te maklik met ‘n geestelike honger wat onnodig is.

Met Jesus in jou hart en in jou lewe, het elke Jesus-mens dan die Lewe – dit is Lewe wat slegs deur Jesus se sterwe en opstanding vir ons moontlik gemaak is. En elkeen wat op hierdie wyse geestelike kos ontvang en so versadig word, kan dit nie vir homself of vir haarself hou nie. Ware Lewe in Christus, is selfloos en wil spontaan en vrywillig gedeel en uitgedeel word.

Jesus het die uitnodiging gerig “Wie na My toe kom, sal nooit weer honger kry nie”. Met Hom in jou as Jesus-mens, word jy self die uitnodiging aan elke geestelik honger mens. Laat jou lewe die brood word wat Lewe beteken vir ander ...

Oordenking 13 April 2014

Die finale Offer ooit!

“Deur die één offer het Hy dié wat vir God afgesonder word, vir altyd volkome van sonde vry gemaak.” (Hebreërs 10:14)

Ons is besig om onsself gereed te maak vir die herdenking van die grootste gebeurtenis in die geskiedenis van die mensdom, die kruisiging en die opstanding van Jesus, ons enigste Verlosser. Paasnaweek is vir ons belangriker as Kersdag. Ek is bereid om dit elke jaar te herhaal, so belangrik is dit vir my. Hier is die geloofswaarhede uit die heilige Skrif wat dit bevestig:

1.       “... Jesus Christus het één offer vir die sondes gebring ...” (Hebreërs 10:12a) Die eenmalige sterwe van Jesus aan die kruis was vir ewig die volledige offer vir alle sondes van alle mense van alle tye ... JA, DIT IS WAAR!!!

2.       “... Jesus Christus ... het vir altyd aan die regterhand van God gaan sit.” (Hebreërs 10:12b) Met die finale afhandeling van die verlossing van alle sondaars, neem Jesus vir ewig die heerskappyposisie oor die hele mensdom en die ganse skepping in ... JA, DIT IS WAAR!!!

3.       “Nou wag Hy daar totdat sy vyande aan Hom onderwerp is.” (Hebreërs 10:13) Met die kruisiging is die satan finaal oorwin deur Jesus vir elkeen wat glo in Jesus, maar die satan en sy medewerkers het beperkte mag op aarde totdat die wederkoms van Jesus plaasvind ... JA, DIT IS WAAR!!!

4.       “... het Hy dié wat vir God afgesonder word, vir altyd volkome van sonde vry gemaak.” (Hebreërs 10:14) Elkeen wat glo in Jesus se sterwe en opstanding se geloofswaarheid, dit is elke Jesus-mens, leef nie meer onder die las van die sonde nie ... JA, DIT IS WAAR!!!

5.       “Ook die Heilige Gees betuig dit aan ons.” (Hebreërs 10:15) Die Gees van God in elke Jesus-mens maak die verlossingswerk van Jesus ‘n groeiende werklikheid in elkeen ... JA, DIT IS WAAR!!!

6.       “Aan hulle sondes ... sal Ek nooit meer dink nie.” (Hebreërs 10:17) God hou geen rekord van sonde in Jesus-mense se lewens nie ... JA, DIT IS WAAR!!!

7.       “Waar die sondes vergewe is, is geen offer daarvoor meer nodig nie.” (Hebreërs 10:18) Jesus-mense het glad nie nodig om enige bydrae te lewer of enige opoffering te maak om vergifnis vir enige sonde te ontvang nie ... JA, DIT IS WAAR!!!

Glo jy dat Jesus finaal vir al jou sondes gesterwe het? Hy hét! JA, DIT IS WAAR!!!

Oordenking 16 Maart 2014

Die Godstad: waar Hy alles gee en oor alles tevrede is

“... die boom van die lewe. Hy dra twaalf keer per jaar vrugte ...” (Openbaring 22:2)

In ʼn mindere of ʼn meerdere mate, sien elkeen van ons uit na ʼn lewe waar alles volkome in plek is: alle gebroke verhoudings is herstel, elke siekte is genees, alle oortrokke rekeninge is betaal, daar is geen toetse wat geslaag hoef te word nie, daar is glad nie ʼn probleem sonder ʼn oplossing nie, daar is geen bekommernis oor enige moeilike situasie wat hanteer hoef te word nie. Klink dit alles net te goed om waar te wees? Wel, vir inwoners van die Godstad, is alles in die lewe volkome in plek! En wel om die volgende redes en op die volgende wyse:

·         God se volmaakte teenwoordigheid is in plek in elke Jesus-mens. Deur “die sewe Geeste voor sy troon” (Openbaring 1:4) is Hy volledig die Een wat altyd by ons is, al gebeur wat ook al.

·         En omdat Hy nooit weggaan of verdwyn, al loop dinge hoe erg verkeerd in ons lewens, is Hy self die Antwoord en die Voorsiening in alles in ons lewens.

·         Daar is nie meer seisoene in die Godstad nie: “... die boom van die lewe. Hy dra twaalf keer per jaar vrugte ...” (Openbaring 22:2) Die betekenis vir ons is dat die Een op die troon van ons lewe, oorvloedig voorsien.

·         “Die blare van die boom bring genesing vir die nasies.” (Openbaring 22:2) Hy voorsien in elke vorm van fisiese genesing wat Jesus-mense die nodigste het, dit is alle vorme van honger of dors of siekte. Maar Hy voorsien by uitnemendheid in elke vorm van geestelike genesing, dit is die voortdurende herstel en opbou van ons intieme verhouding met Hom in ons.

·         Binne die nuut-wordende verhouding wat elke inwoner van die Godstad het, word alle grense wat skade veroorsaak finaal verwyder en alle vooroordele teenoor alle partye betrokke, word verwyder. “Daar sal nie ʼn enkele ding oorbly waarmee God ontevrede is nie.” (Die Boodskap)

Wat is jou grootste honger of siekte in jou geestelike lewe? Waarmee is jy nog ontevrede in jou eie lewe? Of waarmee dink jy is God nog ontevrede met jou? Wat dit ook al mag wees wat die vrug in jou lewe steel, Hy wil dit herstel omdat Hy alles gee en oor alles tevrede is.

Laat ons leef met die volgende in ons harte: “Oorvloed-Gewer, so opreg waardering dat U tevrede is met my!”

Oordenking 9 Maart 2014

Die Godstad: gratis oorvloed lewe

“... water van die lewe ...” (Openbaring 22:1)

Sien die prentjie van die bejaarde man Johannes wat as banneling op die eiland Patmos die brief Openbaring skryf aan Christene wat so erg vervolg word dat hulle lewens in gevaar is en hulle van hongerte dood gaan. Of dink aan jou eie onsekerhede van tekort aan liefde, of geld, of goeie gesondheid, of innerlike kalmte, of waaraan jy ook al tekort mag hê.

Dan word daar vir die oorspronklike lesers van Openbaring en vir jou oorvloed belowe. En dit alles nog gratis en verniet ook: “... elkeen wat dors het ... moet dit kom kry, verniet!” (Openbaring 22:17) Jy hoef NIE met jou lewe te betaal om ‘n Jesus-mens te wees NIE, Jesus het klaar sy lewe aan die kruis daarvoor gegee. Jy hoef NIE te betaal vir jou plekkie eendag by Jesus se voete in die hemel NIE, Hy bied dit sonder enige verdienste aan. Jy hoef NIE God se guns te soek NIE, Hy bederf jou met al sy goedheid onvoorwaardelik, omdat Hy is wie Hy is.

Hoor hoe mooi het Jesus dit self gesê toe Hy nog as mens hier op aarde was: “Strome lewende water sal uit sy binneste vloei. ... na die Gees verwys.” (Johannes 7:38-39) Ons as Jesus-mense word vol gemaak met die Gees van God, sodat Hy ons kan gebruik as kanale van oorvloed lewe, die lewe waarna die verlorenes smag. Ons is God se antwoord op elke tekort, elke pyn, elke hartseer – so het Hy besluit om te wys wie Hy regtig is. Hy is besig om die wêreld ‘n beter plek te maak vir elkeen wat vir Hom plek in sy lewe maak. Dit alles gebeur in die Godstad: in ons bekeerde verhouding met Hom, in ons band met die geloofsgemeenskap waarin ons Hom aanbid.

As inwoners van die Godstad deel ons gesamentlik in al die voordele wat dit vir ons bied, want “... dit stroom uit die troon van God en van die Lam uit.” (Openbaring 22:1) Alles wat mooi is, alles wat goed is, alles wat met liefde te doen het, alles wat opbouend en vernuwend is, kom van ons Inwonende-Skepper-Gees-God!

Dit is die maklikste en allerbeste om ‘n inwoner van die Godstad te wees! Geen druk, geen tekort, geen prestasie, geen boosheid, geen ekkigheid vir elke geliefde en elke soekende een van ons.

Kom ons sê net opreg: “1000 dankies, Oorvloed-gewer, vir die verniet-lewe!”